Los mapes son ferramientes non neutrales ya imprescindibles pa tresformar la realidá. Históricamente sirvieron, por exemplu, pa planificar la conquista militar o pa promover la esplotación turística de ciudaes y territorios. Más de recién, l'arte la cartografía, nun procesu d'abaxo p'arriba, vien siendo utilizada polos movimientos sociales ya iniciatives ciudadanes pa consiguir la so propia axenda, dacuando en vez, opuesta a los estamentos del poder.
D'igual forma, el boom de les tecnoloxíes dixitales tuvo un gran impactu nel ámbitu de la cartografía. Gracies a llibertá d'accesu a nuevos métodos de representación y a les redes d'intercambiu, los ciudadanos y ciudadanes construyen les sos representaciones de la realidá respecto a una montonera fuentes d'información. El movimientu del software llibre -y el de los datos llibres que se mueve xunto a él-, tienen ayudao sobre manera a estes iniciatives, poniendo a disposición de tol mundu una gran batería de ferramientes y bases de datos nes que basar los sos trabayos.
Mapiando Asturies ye un proyectu d'investigación que s'enmarca nesta tesitura contemporánea.
“Mapa” n'asturianu significa “exemplu, modelu, muestra”, “llugar que sirve de modelu pa dalgo”. Con esta acepción particular, por superlativa, del términu, “eso ye la mapa les mazanes” sería "ye'l meyor sitiu onde se dan mazanes" o "el terrenu que da buenos frutos" (*). Mapiando Asturies persigue producir un modelu de buenes práctiques nel ámbitu de la cartografía ciudadana, insertando ésta nes dinámiques del procomún y de la cultura llibre.
La idea del proyectu surdió nel taller ¿Qué mapiar? Sobre metodoloxíes y construcción participativa de cartografíes táctiques que tuvo llugar nel contestu del proyectu Situation Room realizáu en LlABoral Centru d'Arte y Creación Industrial ente xineru y marzu de 2008. Nel trescursu d'esti taller presentáronse dellos proyectos de cartografíes crítiques ciudadanes puestes en marcha nos últimos años en Sevilla, Málaga, Barcelona, Estambul, Venecia o L’Estrechu de Xibraltar. Mapiando Asturies ye la continuación d'esta praxis.
El proyectu materialízase nuna serie vertientes que van de lo técnico, col desarrollu de software llibre, a lo esperiencial, cola toma datos al traviés de la consulta ciudadana. De la escala global, cola realización del I Alcuentru Internacional de la temática, a la escala local, cola producción d'una cartografía dixital y participativa sobre Asturies o d'una guía educativa con vocación de ser incorporada nos programes docentes de la enseñanza de xeografía y conocimientu’l mediu.
