L'envís ye producir, con ferramientes llibres, un sistema dixital de representación d'Asturies onde se xeorreferencien y se xeoetiqueten “informaciones sensibles”. Estes informaciones sensibles estructúrense al traviés de cuatro canales que funcionen como taxonomía o lleenda del mapa:
- Puntos nodales: aquellos llugares o espacios de la rexón que tienen un valor estratéxicu, que funcionen como “amplificadores” afectando a un ámbitu muncho mayor. Pueden ser llugares físicos pero tamién simbólicos.
- Oportunidaes y recursos: localización de proyectos emancipadores, procesos emerxentes.
- Conflictos y amenaces: territoriales, ambientales, llaborales, tresformaciones negatives en marcha.
- Acontecimientos: trátase de facer una historiografía de la rexón empezando nel 2008 y xeorreferenciando los acontecimientos más relevantes.
El mapa dixital desarrollóse col software meipi(*). Esti software permite editar el mapa como un wiki “nel que l'usuariu pue dexar archivos multimedia asociaos a un llugar exactu del territoriu, de manera que les imáxenes, les impresiones personales, los soníos, les histories y los paisaxes percibíos polos habitantes puedan ser compartíos d'una manera inmediata y cotidiana”.
Entendemos que tol mundu ye espertu na realidá que lu arrodia, bien a escala de la cai, el barriu, el conceyu o'l valle, o a la escala d'Asturies nel contestu de la globalización. Ufiertando l'accesu fácil a la ferramienta de mapéu “online” cualquier persona pue convertise en “cartógrafu” asitiando y compartiendo los sos propios conteníos.
(*)Meipi ye un proyectu de web xeoespacial desarrolláu por Domenico Di Siena, Alfonso Sánchez Uzábal, Jorge Álvaro Rey, Guillermo Álvaro Rey, Francesco Cingolani y Pablo Rey Mazón. Mapiando Asturies contribuye a l’ameyoramientu del proyectu Meipi cola ayuda económica destinada a la lliberación del so códigu fuente.
