La cartografía dixital basada na participación ciudadana permítenos analizar la realidá d’un territoriu, compartiendo de manera horizontal conocimientos históricos, xeográficos, económicos...
Mapiando Asturies da a conocer les posibilidaes d’estes cartografíes, basaes na web social o web 2.0, dientro del ámbitu educativu y social.

Dende la llinia educativa del proyectu trabáyase de forma conxunta con profesores de secundaria y responsables d’asociaciones pa dar a conocer la ferramienta ente los usuarios y usuaries potenciales. Al traviés de presentaciones, talleres y charres llégase a un públicu que, nel casu de los escolinos y escolines, va tar guiao pol so profesoráu a la hora de realizar análisis y debates sobre la realidá mostrada.

Son munchos los exemplos de proyectos colectivos y educativos que “mapien” la flora del so barriu, los recursos asociativos de la ciudá o la tradición oral. Dende’l proyectu educativu trabayamos pa ellaborar una guía con exercicios prácticos pal alumnáu, que pueda utilizase nos diferentes departamentos de los centros d’estudiu y escueles (*).

(*) La edición 2008 del Festival Internacional Zemos 98 -desarrolláu pol equipu Zemos en collaboración con Juan Freire- tuvo como tema la Educación Espandida, una propuesta que busca resignificar la educación de manera que nun tea circunscrita namás qu’al ámbitu académico-institucional, esplorando nueves formes d’educación qu’incorporen y s’adapten a los procesos sociales y comunicacionales que provocó Internet (www.educacionexpandida.org).